11) AZƏRBAYCAN DÖVLƏT RADİOSUNUN 100, DÖVLƏT TELEVİZİYASININ 70 İLLİYİ QARŞISINDA

DOĞUM GÜNÜMƏ HƏDİYYƏM - YAŞIM 73 OLDU

Özünü sevmək eqoizm və ya təkəbbür deyil. Bu, psixoloji sağlamlığın, emosional tarazlığın və sağlam münasibətlərin təməlidir. Özünü sevmək - İnsanın öz güclü və zəif tərəflərini, qüsurlarını mühakimə etmədən qəbul etməsidir. Səhvlər üçün özünü ömürboyu qamçılamaq əvəzinə, onlardan dərs çıxarıb irəli baxmalısan. Özünlə danışarkən ən yaxın dostunla danışırmış kimi mehriban ol. Özünə vaxt ayır. Səni xoşbəxt edən, enerjini bərpa edən kiçik belə olsa vərdişlər qazan. Müqayisəni burax, hər kəsin həyat tempinin fərqli olduğunu və hər kəsin özünəməxsus inkişaf yolu olduğunu qəbul et.

Hər bir dövrün, hər bir cəmiyyətin özünəməxsus dəyərlər sistemi və insan idealı formalaşır. Lakin zamanın fövqündə duran, heç vaxt köhnəlməyən və dəyərini itirməyən elə keyfiyyətlər var ki, onlar insanı insan edən əsas sütunlardır. Bu ali keyfiyyətlərin başında isə mərdlik dayanır. İnsan mərd olsun gərək. Mərdlik insanın ən ali, mənəvi ucalığıdır.

Təsadüfi deyil ki, xalqımızın minillik təfəkkürünün, mənəviyyat süzgəcinin məhsulu olan "insan mərd olsun gərək" kəlamı sadəcə bir arzu deyil, hər bir kəsin daxili dünyasını tənzimləyən mənəvi bir imperativdir, yəni mənəvi əmrdir, tələbdir.

Mərdlik nədir? Bu məfhumu sadəcə fiziki güc, qorxmazlıq və ya cəsarətlə məhdudlaşdırmaq onun mahiyyətini kiçiltmək olardı. Mərdlik, ilk növbədə, ruhun ucalığı, vicdanın təmizliyidir. Mərd insan sözü ilə əməli bir olan, çətinliklər qarşısında sınmayan, xəyanətdən və yalandan uzaq qaçan şəxsdir. Belə bir insan üçün şəxsi mənafe heç vaxt haqdan, ədalətdən və dostluq vəfadarlığından uca ola bilməz. Mərdlik insanın həm özünə, həm də ətrafındakılara qarşı dürüst olmasıdır.

Mərdliyin əksi olan namərdlik isə cəmiyyəti daxildən gəmirən bir xəstəlik kimidir. Namərd insan kölgədə gizlənən, fürsət gözləyən, çətin anlarda arxadan zərbə vurmağa hazır olan xaraktersiz bir varlıqdır. Tarix boyunca və şifahi xalq ədəbiyyatımızda mərdlə namərdin mübarizəsi həmişə ana xətt olmuşdur. Dastanlarımızda, atalar sözlərimizdə hər zaman mərdin süfrəsinin açıqlığı, çörəyinin halallığı, namərdin isə etibarsızlığı təsvir edilmişdir. Mərd ölümdən qorxmaz, namərd isə hər gün qorxu içində yaşayar, - deyən atalarımız insanın daxili azadlığının məhz mərdlikdə olduğunu vurğulamışlar.

Müasir dünyamızda, maddi dəyərlərin bəzən mənəvi dəyərləri üstələdiyi bir dövrdə bu kəlam daha böyük aktuallıq kəsb edir. Bu gün mərd olmaq təkcə döyüş meydanında şücaət göstərmək deyil, bu gün mərd olmaq haqsızlığa qarşı səsini ucaltmaq, zəifə əl tutmaq, kiməsə verilən sözü canı bahasına olsa da tutmaq deməkdir. Mərd insan ətrafına güvən və işıq saçır. Onun varlığı cəmiyyətdə insanlığa olan ümidi artırır.

Yekun olaraq demək olar ki, adam dünyaya sadəcə bioloji bir varlıq olaraq gəlir, lakin insan adını qazanmaq və onu ləyaqətlə daşımaq hər kəsə nəsib olmur. "İnsan mərd olsun gərək" fikri bizə hər addımımızda kimliyimizi, mənəvi məsuliyyətimizi xatırladan bir mayakdır. Çünki bu müvəqqəti dünyadan köçərkən insandan geriyə qalan nə var-dövlət, nə də vəzifə olur, yalnız və yalnız qazanılmış mərd və təmiz bir ad qalır.

Bu günədək səmimiliyim, dürüstlüyüm, cəsarətim və verdiyim vədə sadiqliyim sayəsində çox insanlar arasında hörmət qazandım. Başqalarının haqqına girmədim. Hər kəsə bərabər və dürüst yanaşdım. İnsanlara yuxarıdan aşağı baxmadım. Təkəbbürdən uzaq durdum və hər kəsə bir şəxsiyyət kimi dəyər verdim. Daim öyrənməyə meylli oldum, öz üzərimdə çalışdım, peşəkar və şəxsi mühitdə balanslı münasibətlər quraraq nüfuzumu gücləndirdim.

 

İNDİ İSƏ SİZƏ RƏSMİ 

BİOQRAFİK MƏLUMATIMI TƏQDİM EDİRIM

Mən, Adil İrşad oğlu Əliyev 1953 - cü il noyabrın 1-də Ağdam şəhərində ziyalı ailəsində doğulmuşam.

Soy - kökü Ağdamın Sarıhacılı və Seyidli kəndlərindən olan, Qarabağ xanı Pənahəli Cavanşirin əqrabası sayılan, Azərbaycanın görkəmli yazıçısı Süleyman Sani Axundovun nəslindən olan, atam İrşad Məhəmməd oğlu Əliyev ömrünün axırınadək dövlət orqanlarında müxtəlif məsul vəzifələrdə çalışmışdır. Ağdamın erməni təcavüzkarları tərəfindən işğalı ərəfəsində, 1993 - cü ilin mart ayında haqsızlıqlara tab gətirməyərək dünyasını dəyişmişdir. Ağdamın "Birinci Şəhidlər Xiyabanı"nda dəfn edilmişdir.

(Doğum tarixi : 25.02.1924. - Ölüm tarixi : 13. 03. 1993).

Soy - kökü Ağdamın Xıdırlı kəndindən olan anam, Qənirə Rüstəm qızı Rüstəmova 50 ildən çox Ağdam şəhər 2 saylı beynəlmiləl orta məktəbin hər iki bölməsində - Azərbaycan və rus bölməsində fizika - riyaziyyat fənnlərindən dərs demişdir. Azərbaycan Təhsil Nazirliyinin əmri ilə sonradan həmin məktəbin rus bölməsi ayrılaraq Ağdam şəhər 7 saylı orta məktəbə çevrilmiş və sərbəst fəaliyyət göstərmişdir. Qənirə Rüstəm qızı Rüstəmova yataq xəstəsi olanadək Ağdam şəhər 7 saylı orta məktəbdə fizika - riyaziyyat müəlliməsi işləmişdir. Anam məcburi köçkün həyatını Bakı şəhərində - mənim ailəmlə birlikdə yaşamışdır və bizim gözümüzün önündə dünyasını dəyişmişdir.

(Doğum tarixi : 30.12.1932. - Ölüm tarixi : 27. 09. 2012).

1955 - ci il təvəllüdlü bacım, Elmira İrşad qızı Əliyeva müəllimə işləyirdi. 02.05.2026-cı ildə dünyasını dəyişdi. Onu Abşeron torpağına əmanət etdik.

1960 - cı il təvəllüdlü qardaşım, Oqtay İrşad oğlu Əliyev Biləsuvar, Ağdam, Goranboy, Yardımlı rayonlarının milli təhlükəsizlik idarələrində, sonradan Azərbaycan Respublikası Milli Təhlükəsizlik Nazirliyində nümunəvi çalışmış və 2006 - cı ilin fevral ayında (27 fevral) iş başında vəfat etmişdir.

Ailəliyəm. İki oğlum, bir nəvəm var.

Mən, Adil İrşadoğlu (Əliyev) 1961 - ci ildə Ağdam şəhər 1 saylı orta məktəbə daxil olmuşam. 1971 - ci ildə həmin orta məktəbi əla qiymətlərlə başa vurmuşam. Orta məktəbdə oxumaqla yanaşı - 1968 - ci ildə Üzeyir Hacıbəyov adına Ağdam şəhər Orta İxtisas Musiqi Məktəbinə də daxil olmuşam və 1972 - ci ildə həmin məktəbi tar ixtisası üzrə bitirmişəm. 1972 - ci ildə S.M.Kirov adına Qırmızı Əmək Bayrağı ordenli Azərbaycan Dövlət Universitetinə ( indiki BDU -ya ) daxil olmuş və 1977 - ci ildə həmin universitetin jurnalistika fakültəsini əla qiymətlərlə başa vurmuşam. Sonra Azərbaycan Kommunist Partiyası Mərkəzi Komitəsinin göndərişinə əsasən, Dövlət Televiziya və Radio Verilişləri Komitəsində kiçik redaktor, böyük redaktor və şöbə müdiri vəzifələrində işləmişəm. Teleradio Verilişləri Komitəsinin rəhbərliyi ictimai işlərdəki səriştəliliyimi nəzərə alaraq məni Azərbaycan Kommunist Partiyası Mərkəzi Komitəsinin Marksizm - Leninizm Universitetinə siyasi təhsil almağa göndərmişdir. 1982 - ci ildə həmin universiteti əla qiymətlərlə başa vurmuşam. Dağlıq Qarabağdan azərbaycanlıların sıxışdırılıb çıxarılmasının qarşısını almaq üçün 1989 - cu ildə Şuşa şəhərinin teleötürücü stansiyasının nəzdində kiçik studiyanın yaradılmasında və erməni daşnaqlarına qarşı əks təbliğatın aparılmasında yaxından iştirak etmişəm. Həmçinin, dövlət televiziyasının “Hərbi Vətənpərvərlik və Salnamə Baş Redaksiyası”nın təşkil olunmasında və fəaliyyət göstərməsində əlimdən gələni əsirgəməmişəm. Teleradio Verilişləri Komitəsində işlədiyim müddətdə 3000 - dən çox veriliş hazırlayıb efirdə göstərmişəm. 1988 - ci ildən bugünədək Qarabağla bağlı hadisələrdə yaxından iştirak etmişəm. 1 - ci Qarabağ müharibəsinin iştirakçısıyam. Cəbhədən hazırladığım verilişlər yəqin ki, AzTV-nin arxivində indi də saxlanılır.

Hazırladığım verilişlərə görə, müxtəlif mükafatlara layiq görülmüşəm. Xalq təsərrüfatının inkişaf etdirilməsində yaxından iştirak etdiyimə görə, SSRİ XTNS Baş Komitəsinin 8 dekabr 1981 - ci il tarixli qərarına əsasən, xüsusi medalla təltif olunmuşam. Respublikanın yenilikçi və səmərələşdiricilərinin xalq təsərrüfatının inkişaf etdirilməsindəki fəaliyyətini geniş və mütəmadi işıqlandırdığıma görə, Yenilikçi və Səmərələşdiricilərin Ümumittifaq Cəmiyyəti Bakı Şəhər Sovetinin Fəxri fərmanına layiq görülmüşəm. Məhsuldar və keyfiyyətli əməyimə görə, Dövlət Televiziya və Radio Verilişləri Komitəsi sədrinin 5 noyabr 1987 - ci il tarixli qərarına əsasən, Fəxri fərmanla təltif edilmişəm. Ordumuzun formalaşmasında yaxından iştirak etdiyimə görə, "N" saylı hərbi hissə komandirinin 17 noyabr 1994 - cü il tarixli qərarına əsasən, Fəxri fərmana layiq görülmüşəm. Cəbhədə əsgər və zabitlərimizin həyatından hazırladığım salnamələrə görə, "N" saylı hərbi hissə komandirinin 1 avqust 1995 - ci il tarixli qərarına əsasən, "ŞAH İSMAYIL XƏTAİ" adına Fəxri fərmanla mükafatlandırılmışam. 25 oktyabr 2018-ci il tarixində Azərbaycan mətbuatının inkişafındakı xidmətlərimə görə və 65 illik yubileyim münasibətilə Azərbaycan Mətbuat Şurasının xüsusi diplomu və Ahıl Jurnalistlər Məclisinin xatirə hədiyyəsi olan "Qızıl qələm" lə təntənəli şəkildə təltif edilmişəm. 29 dekabr 2018-ci il tarixində Qarabağ müharibəsi zamanı əsgər və zabitlərimizin şücaətindən bəhs edən silsilə televerilişlər hazırladığıma, qazilərə daim mənəvi dəstək olduğuma görə və 65 illik yubileyim münasibətilə “Qarabağ qaziləri” və “Vətən Müharibəsi Əlilləri” ictimai birlikləri tərəfindən Fəxri Diplomla təltif olunmuşam. 

3 Noyabr 2023-cü il tarixində milli mətbuat ənənələrimizin qorunmasına yönələn xidmətlərimə, zəngin yaradıcılıq dəst-xəttimə, jurnalistika sahəsində çoxillik səmərəli fəaliyyətimə görə və 70 illik yubileyim (01.11.1953 - 01.11.2023) münasibətilə təşkil edilmiş rəsmi yığıncaqda Azərbaycan Mətbuat Şurasının xüsusi diplomu və Ahıl Jurnalistlər Məclisinin xatirə hədiyyəsilə təntənəli şəkildə təltif olunmuşam. 

Azərbaycan Respublikasının Prezidenti cənab İlham Əliyevin müvafiq Fərmanına əsasən ölkəmizdə milli mətbuatın inkişafına verdiyim töhfələrə görə Azərbaycan Respublikası Medianın İnkişafı Agentliyinin İcraçı direktoru Əhməd İsmayılovun 2025-ci il 30 oktyabr tarixli İ-020 nömrəli əmrilə “Azərbaycan milli mətbuatının 150 illiyi (1875-2025)” yubiley medalı ilə təltif edilmişəm.

1980 - ci ildə Gənc Jurnalistlərin Moskva şəhərində keçirilən Ümumittifaq müşavirəsinin iştirakçısı olmuşam. 1980 - ci ildən Azərbaycan Jurnalistlər İttifaqının üzvüyəm. Dövlət Televiziya və Radio Verilişləri Şirkətində fəaliyyətimin son illərində cəbhə bölgələrindən, ön mövqedən könüllü canlı verilişlər hazırlayıb xalqımıza göstərməyi vətəndaşlıq borcum bilmişəm. Teleşirkətin 1-ci Qarabağ müharibəsi arxivinin yaradılmasında yaxından iştirak etmişəm. 1997 - ci ilin sonunda inciyərək məndən asılı olmayan amillərlə bağlı 20 il (Tələbə ikən 5 il ştatdankənar) can qoyduğum dövlət teleşirkətində işləməkdən imtina etmişəm.

Buvaxtadək mənə nə "MÜHARİBƏ İŞTİRAKÇISI", nə də "MÜHARİBƏ VETERANI" adı verilməyib. Dövlətin heç bir qayğısı ilə mükafatlandırılmamışam. Təəssüf ki, mənim kimi digər cəbhə jurnalistləri də öz layiqli qiymətlərini almayıblar. Ancaq "Qarabağ qaziləri" ictimai birliyinin sədri Asəf Kərim oğlu Əliyevin və birliyin idarə heyyəti üzvlərinin təşəbbüsü ilə məni 1-ci Qarabağ müharibəsindəki xidmətlərimə görə "Qarabağ qaziləri" ictimai birliyinə üzv qəbul etdilər və halalca qazi adımı rəsmiləşdirib özümə qaytardılar. Bunu AzTv-nin arxivindəki, şəxsi arxivimdəki ön cəbhədən hazırladığım saysız-hesabsız verilişlərim, çəkilən fotolarım və yazılarım sübut edir. Yadınızda saxlayın ki, müharibədə savaşı aparan qazi, savaşda həlak olan isə şəhiddir. QAZİ YARALI ƏSGƏR DEMƏK DEYİL !

Ağdamda babalarımın, nənələrimin, atamın mülkü olub. Mən də varisəm, mülkümü vərəsəliklə, qanuni yol ilə istəyirəm. Dövlət birinci növbədə məcburi köçkün statusu olanları evlə təmin etsin. Ancaq mənim rastlaşdığım vəziyyətdə yaşayan insan da çoxdur. Bu məsələ ilə bağlı  dövlətimizə 2 dəfə yazılı şəkildə müraciət etmişəm. Təəssüf ki, bugünədək heç bir cavab almamışam. Azərbaycana ləkə öz ata-baba yurdunda haqqını tələb etmək deyil. Bu məsələ olduqca ciddidir, düşünürəm ki, qaçqın və məcburi köçkün statusuna yenidən baxılmalıdır. Mən öz qiymətimi yaxşı bilirəm. Yeni Ağdam şəhərində mənə nəinki ev verilməli, həm də Vətən üçün könüllü və təmənnasız xidmətlərimi nəzərə alıb  adıma küçə salınmalıdır. Söhbət puldan yox, qanundan gedir.  

Teleşirkətdə işlədiyim zaman müxtəlif qəzet və jurnallarda maraqlı yazılarımla çıxış etmişəm. Sonralar "Yeni dünya" qəzetinin baş redaktorunun birinci müavini, zamanında populyarlıq qazanmış "De Fakto" qəzetinin qurucusu və ilk baş redaktoru, "Çempion" adlı rəngli, 24 səhifəli, həftəlik idman qəzetinin baş məsləhətçisi, "Sara - ekspress" qəzetinin məsul katibi, "Olaylar" qəzetinin baş direktoru, "Şans" qəzetinin baş direktoru, "Novıy mir" qəzetinin redaktoru, Qarabağ Əlillər Cəmiyyətinin orqanı olan "Əlillər" qəzetinin məsul redaktoru, Qarabağ Azadlıq Təşkilatının orqanı olan "Azad Qarabağ" qəzetinin məsul redaktoru və Azərbaycan İdman Jurnalistləri Assosiasiyasının vitse - prezidenti olmuşam. 17 saylı Yasamal 3-cü seçki dairəsi üzrə 29 saylı seçki məntəqəsində 4 dəfə seçki komissiyasının katibi işləmişəm. Qarabağ Əlillər Cəmiyyətinin fəxri üzvüyəm. Qaziyəm və “Qarabağ qaziləri” ictimai birliyinin fəal üzvüyəm, vəsiqə №2613. 

Hazırda Azərbaycan Respublikasında Vətənpərvərlik mövzusunda fəaliyyət göstərən ilk internet televiziyanın - "İRŞAD - Teleradio Verilişləri, Sənədli və Bədii Filmlər Kompaniyası" Məhdud Məsuliyyətli Cəmiyyətin təsisçisi və direktoru, Jurnalist - Müharibə Veteranları Assosiasiyası sədrinin birinci müaviniyəm. İctimai əsaslarla işləyirəm. Əmək pensiyasından başqa heç bir yerdən gəlirim yoxdur. 50 ildən çoxdur ki, jurnalistlik fəaliyyətilə məşğulam. ALLAH məni nadan insanların qarşısında sındırmasın, ALLAH əzizlərimin canını sağ eləsin! AMİN...

-----

İNDİ MÜSTƏQİL JURNALİST OLARAQ FƏALİYYƏT GÖSTƏRİRƏM. AŞAĞIDAKILAR ŞƏXSİ SAYTLARIMDIR. DİQQƏT EDİB BAXSANIZ XEYLİ QAZANARSINIZ...

1) https://www.facebook.com/REALIST.A.Irshadoglu?ref=tn_tnmn

2) https://www.facebook.com/A.Irshadoglu.RealistAdil/?ref=bookmarks

3) http://adilirshadoglu.blogspot.com/

4) http://realistadil.blogspot.com/

5) http://realistadil.blogspot.com/2016/04/ermnistan-azarbaycan-muharibsi.html 

6) http://realistadil.blogspot.com/2016/04/ermanistan-azarbaycan-muharibasi.html

7) http://realistadil.blogspot.com/2016/04/ermanistan-azarbaycan-muharibasi_20.html

8) http://realistadil.blogspot.com/2016/04/ermanistan-azarbaycan-muharibasi_13.html

9) https://www.facebook.com/A.Irshadoqlu.Turklerinizinde/

10) https://www.facebook.com/groups/A.Irshadoqlu.Jurnalistikamuharibede/

11) https://www.facebook.com/AdilIrshadogluCanAzerbaycan/

12) https://www.facebook.com/irshadtv.az/

13) http://www.irshadtv.com/

14) https://twitter.com/aliyev_adil

15) https://www.linkedin.com/in/adil-irshadoglu-aliyev-886bb2a8/

❤️ © Adil İrşadoğlu Cavanşir (Əliyev).

Veteran televiziya və qəzet jurnalisti,

Azərbaycan Jurnalistlər Birliyinin üzvü (1980),

1-ci Qarabağ Müharibəsinin iştirakçısı-Qazi (1988-1996).

Mükafata görə düzəliş edildi : 01.11.2018 / 30.12.2018 / 03.11.2023 / 30.10.2025-ci ildə.

Yazımı yenidən işlədim: 30.10.2026. / 12-00.

Paylaşdım: 03.11.2026. / 14-00.

10) AZƏRBAYCAN DÖVLƏT RADİOSUNUN 100, DÖVLƏT TELEVİZİYASININ 70 İLLİYİ QARŞISINDA

 SƏNƏTİN SƏNİ DAİM YAŞADACAQ

Azərbaycanın tanınmış rejissoru və aktyoru Arif Əbdül oğlu Qasımov ən əziz və sevimli dostlarımdan biri idi. O, 66 yaşında ürəktutmasından dünyasını dəyişdi və biz, digər onu tanıyanlar çox sarsıldıq. AzTv - də uzun müddət televiziyanın ən çətin və gərgin iş tələb edən Təbliğat Baş redaksiyasında birlikdə çalışırdıq. Çox ürəyi təmiz, səmimi, mehriban, daim üzügülər, istedadlı, məsuliyyətli və qabiliyyətli insan idi. 

Bəli, ən yaxşı və sevimli iş yoldaşı hər bir kollektivin əsl dayağıdır. Belə bir insanla işləmək ən çətin günləri belə maraqlı və asan edir.

Arif Qasımov səhər tezdən redaksiyaya gəlib işə başlamazdan əvvəl xoş təbəssümü və zarafatları ilə şöbəmizdəki işçilərin əhval-ruhiyyəsini yüksəldərdı. O, işlərin çox olduğu vaxtda kömək əlini uzatmaqdan yorulmazdı. Problemləri və ya yeni ideyaları bölüşərkən adamı həmişə diqqətlə dinləyər və düzgün məsləhətlər verərdi.

A. Qasımov təkcə iş mövzularında deyil, həm də gərgin anlarda rahatca dərdləşə bildiyim insan idi. Onun müsbət enerjisi mənə hər gün ilham verərdi. Redaksiyada işlərin gərginliyinin, bitmək bilməyən tapşırıqların öhtəsindən gəlmək üçün sənin zarafatların köməyimizə çatardı, Arif. Sən olmasaydın ora çox darıxdırıcı olardı. Hər çətinlikdə yanımızda olduğun və İş günlərimizi rəngarəng etdiyin üçün sənə təşəkkürümüzü bildirərdik.

Azərbaycan Dövlət  Radiosunun 100, Dövlət Televiziyasının 70 illiyi qarşısında Arif Əbdül oğlu Qasımovu xatırlamamaq insafsızlıq olardı. Bu gün minnətdarlıq borcum olaraq bu yazımı da sənin üçün hazırladım və ruhunu şad etməyə çalışdım. 

A. Qasımov AzTv - də rejissor köməkçisi, rejissor assistenti və rejissor işləyib. O, 1950-ci ildə Bakı şəhərində anadan olub. 1968-ci ildə orta məktəbi bitirib. Sonra Mədəni Maarif Texnikumuna, ardınca 1975-ci ildə İncəsənət İnstitutuna daxil olub. İnstitut təhsilini başa vurandan sonra Moskvada Ali Rejissorluq Kursunu da bitirib. Arif Əbdül oğlu Qasımov 38 filmdə irili-xırdalı rollar oynayıb. 

AKTYOR-REJİSSOR ARİF ƏBDÜL OĞLU QASIMOVUN ÇƏKİLDİYİ FİLMLƏR : 

Diplom işi (film, 1979)

Vah!.. (film, 1980)

Böyüyəndə bilərsən... (film, 1981)

Marş (film, 1982)

Ömrün yolları (film, 1982)

Balıq günü (film, 1983)

Evlənmək istəyirəm (film, 1983)

Bayramda yağış (film, 1985)

Mastika (film, 1986)

Yenilik (film, 1986)

Bu da bir naxışdır (film, 1987)

Yaramaz (film, 1988)

777 №-li iş (film, 1992) (tammetrajlı bədii film)

Ac həriflər (film, 1993) (tammetrajlı film-tamaşa) (AzTV) - rol: sarı pencəkli kişi,

"Fransız" (film, 1995)

Səhər (veriliş, 1995)

Qarabağ şikəstəsi (film, 1996)

Hər şey yaxşılığa doğru (film, 1997)

Otel otağı (film, 1998)

Yerlə göy arasında (film, 1999)

Ayna (film, 2000)

Nekroloq (film, 2001)

Hacı Qara (film, 2002)

Yaşıl eynəkli adam -3 (film, 2002)

Dəvətnamə (film, 2003)

Milli bomba (film, 2004)

Əlvida, cənub şəhəri (film, 2006)

Kişiləri qoruyun (film, 2006)

Yoxlama (film, 2006)

Dağlı çörəyi (film, 2007)

Halal pullar (film, 2008)

Qocalar (film, 2008)

Ci-Mi (film, 2008)

Pilləkən (film, 2008)

İstanbul reysi (film, 2010)

Daim üzügülər qardaşım, ALLAH sənə rəhmət eyləsin. Qəbrin nurla dolsun. Ruhun şad olsun. Sən heç zaman unudulmayacaqsan. Çünki sənətin səni daim yaşadacaq.

❤️© Adil İrşadoğlu Cavanşir (Əliyev).

Veteran televiziya və qəzet jurnalisti,

Azərbaycan Jurnalistlər Birliyinin üzvü (1980),

1-ci Qarabağ Müharibəsinin iştirakçısı-Qazi (1988-1996).

Yazımı yenidən işlədim: 16.09.2026. / 12-00.

Paylaşdım: 03.11.2026. / 13-40.   

9) AZƏRBAYCAN DÖVLƏT RADİOSUNUN 100, DÖVLƏT TELEVİZİYASININ 70 İLLİYİ QARŞISINDA

TARİXİ YAŞADAN SƏNƏT FƏDAİSİ

Onu 1980-ci ildən tanıyıram. O vaxtlar o da, mən də gənc idik. Mən,  Azərbaycan Dövlət Televiziya və Radio Verilişləri Komitəsində, Televiziyasının ən ciddi və məsuliyyətli iş tələb edən Təbliğat-təşviqat Baş Reaksiyasında redaktor vəzifəsində çalışırdım. Baş redaktorumuz rəhmətlik Sabir Xuduş oğlu Rüstəmov, şöbə müdirim isə Seyfullah Hənifə oğlu Cəfərov idi.

Hər bir redaktor və rejissor, eləcə də mən televerilişlər hazırlayanda komitənin kinooperatorlar, işıqçılar, avtomobil xidməti, diktorlar, rəssamlar, musiqiçilər, montajçılar şöbələrinə müraciət edirdik. Veriliş hazırlayan zaman o vaxt fotoqraf işləyən Bəxtiyara da tez-tez işim düşürdü, Bəxtiyar Kamil oğlu Babayevi deyirəm. O, sənətinə və ona müraciət edən hər bir kəsə qarşı çox diqqətli və qayğıkeş idi. Həqiqətən həyatda elə insanlar var ki, onlar unudulmur, çünki izləri qəlblərimizdə, xatirələrimizdə və yaşantılarımızda dərin kök salır. Aramızdan ayrıldıqları zaman yerləri heç cür dolmur, yoxluqları hər zaman hiss olunur.

Azərbaycan Dövlət  Radiosunun 100, Dövlət Televiziyasının 70 illiyi qarşısında bu yazımı isə rəhmətlik və unudulmaz Bəxtiyar Babayevə həsr etmişəm. 

Bəxtiyar Kamil oğlu Babayev 14 noyabr 1956-cı ildə Bakı şəhərində doğulub, boya-başa çatıb. 25 saylı orta məktəbi bitirib. 01.09.1970 ildə 3 saylı texniki peşə məktəbinə daxil olub. 1980-ci ildə Moskva səhərində yerləşən Xalq İncəsənət Universitetinin Fotokino Fakultəsini qiyabi bitirib. 1972-ci ildən 1975-ci ilədək Bakı Mexaniki Təmir Zavodunda fəhlə işləyib. 1975-1977-ci illərdə Xabarovsk şəhərində hərbi xidmətdə olub.

19.07.1977-ci ildən 24.04.1978-ci ilədək Cəfər Cabbarlı adına Azərbaycan Dovlət Teatr Muzeyində fotoqraf işləyib. 24.04.1978-ci ildən 01.03.1984-cü ilədək Azərbaycan Dovlət Xalca Muzeyində çalışıb. 01.03.1981-ci ildən 14.01.1994-cü ilədək Respublika Müəllimlər Evində fotoqraf işləyib. Onun foto üzrə müəllimi Bahadır Cəfərov olub.

Bəxtiyar Kamil oğlu Babayev 1980-ci ildən AzTv-də ştatdankənar müxbir işləməyə başlayıb. O, 1994-cü ildən 15 noyabr 2020-ci ilədək AzTv-də teleoperator kimi fəaliyyət göstərib.

Onun televiziyaya gəlişinin əsas səbəbkarı görkəmli televiziya və kino rejissoru, Azərbaycan SSR xalq artisti (1989), Beynəlxalq Televiziya və Radio Akademiyasının akademiki (2004), Azərbaycan Prezidentinin Fərdi təqaüdçüsü (2005) Vasif Babayev olub.

Bəxtiyar Babayev teleoperator işləməklə yanaşı "Ekran-Efir" qəzetində də çalışırdı.

O, seçdiyi və sevdiyi peşəsinin vasitəsilə Azərbaycan Milli Televiziyasının adlı-sanlı peşəkarları ilə tanış oldu və onlardan bəhrələnməyə başladı. Kimlər idi bu peşəkarlar? Baş redaktor Sabir Rüstəmov, Seyfulla Cəfərov, Mirəsədulla Qurbanov, Nazim Zeynalov, Vasif Babayev, yazıçı-publisist Nahid Hacıyev, Mailə Muradxanlı, rejissorlar Nazim Rzayev, Kərim Kərimov, Bünyad Məmmədov, Məhərrəm Bədirzadə, Ramiz Həsənoğlu, Ələkbər Kazımovski, Tofiq Zeynalov və digərlər.

Bəxtiyar Babayev teleoperator işləməklə yanaşı, həm də studiyada yeni hazırlanan tamaşa və konsertlərdə fotolar çəkirdi. İndi həmin fotolar qiymətli tarixə çevrilib. Bəxtiyarın zəngin arxivi var. Mən Bəxtiyarı da, onun arxivini də çox yüksək qiymətləndirirəm.

Bəxtiyar, sənin çəkdiyin fotolar yaşananları gözlər önünə sərməklə dünənlə bu günün müqayisəsini aparmaq üçün bizə geniş imkanlar yaradır. Bu mənada, fotoaparatını süngüyə çevirən sənətkar jurnalist, "AZpress.AZ" xəbər saytının rəhbəri, dostum Rasim Sadıqovun və sənin fotoqrafiya sənətinizi tarixin güzgüsü də adlandırmaq olar. Hamı fotoşəkil çəkə bilər, amma hər kəs əsl fotoqrafın gördüyünü görə bilməz. Bəxtiyar, heyf ki, sən bizləri tez tərk etdin, yaradıcılığının ən parlaq dövründə bu dünyadan köçdün, yaradıcılığın yarımçıq qaldı. Hər kəsin sevdiyi unudulmaz insan Allahdan sənə rəhmət diləyirəm. Qəbrin nurla dolsun. Ruhun şad olsun. 

❤️ © Adil İrşadoğlu Cavanşir (Əliyev).

Veteran televiziya və qəzet jurnalisti,

Azərbaycan Jurnalistlər Birliyinin üzvü (1980),

1-ci Qarabağ Müharibəsinin iştirakçısı-Qazi (1988-1996).

Yazımı yenidən işlədim: 15.09.2026. / 11-30.

Paylaşdım: 26.10.2026. / 13-35.

ALLAH NƏYƏ GÖRƏ MƏNİ SİZSİZ QOYDU?

Əziz və unudulmaz bacım Elmira İrşad qızı Əliyeva 

25 oktyabr sənin doğum günün və bizi tərk etməyinin 

5 ay, 23 - cü günüdür...

Allah sənə rəhmət eyləsin. Qəbrin nurla dolsun. Ruhun şad olsun, BACI. Sən mənə həm ATA, həm ANA, həm də QARDAŞ əvəzi idin. Heç bilmirəm Allah nəyə görə məni sizsiz qoydu? Nədən ?! Çətin imtahandır... Dözmək olmur... Yəqin ki, özü bilən məsləhətdir...

Bu foto Bakı şəhərində, səhv etmirəmsə 1982-ci ildə çəkilib. Zaman o zamandır ki, mən həyat yoldaşım Yeganə xanımla 1 il olardı ki ailə qurmuşdum, bacım Elmira isə məndən bir neçə ay sonra yaxın qohumum, dostum İbrahim Mehdi ilə ailə qurmuşdu. Həqiqətən də, zaman sürətlə axıb gedir. Hər bir fəsil, hər il ömür kitabından bir səhifəni arxada qoyur. Keçən illər insanı daha da müdrikləşdirir, xatirələri isə daha dəyərli edir.

25.10.2026. / 14-45.

8) AZƏRBAYCAN DÖVLƏT RADİOSUNUN 100, DÖVLƏT TELEVİZİYASININ 70 İLLİYİ QARŞISINDA

 

AZƏRBAYCANDA "XALQ ARTİSTİ" FƏXRİ ADINA 

LAYİQ GÖRÜLƏN İLK TELEVİZİYA REJİSSORU

Öz sahəsinin kamil ustadları, korifeyləri ilə çiyin-çiyinə çalışmaq və onlarla yaradıcı ünsiyyətdə olmaq hər bir insan üçün əvəzsiz bir şans və böyük bir xoşbəxtlikdir. Korifeylərin illərlə qazandığı təcrübə, iş prinsipləri və hadisələrə yanaşma tərzi gənc nəsil üçün canlı bir dərslikdir. Onların enerjisi, sənətə olan sevgisi və fədakarlığı ətrafdakı hər kəsi daha yaxşı işlər görməyə ruhlandırır. 

Dostlar əgər sizin də həyatınızda belə bir yaradıcılıq ünsiyyəti və ya birgə iş təcrübəsi varsa, bu, gələcək fəaliyyətiniz üçün çox möhkəm bir təməldir! 

Azərbaycan televiziyasının canlı əfsanəsi və televiziya işçiləri üçün məktəb olan ustad rejissor, xalq artisti möhtərəm Vasif Hacağa oğlu Babayev sizin haqqınızda hazırladığım bu rəsmi bioqrafik məlumatı Azərbaycan Dövlət  Radiosunun 100, Dövlət Televiziyasının 70 illiyi qarşısında hədiyyəm olaraq qəbul edin. Sizə can sağlığı, sağlam uzun ömür və uğurlar arzulayıram.

VASİF BABAYEV KİMDİR ? 

O, görkəmli televiziya və kino rejissoru, Azərbaycan SSR xalq artisti (1989), Beynəlxalq Televiziya və Radio Akademiyasının akademiki (2004), Azərbaycan Prezidentinin Fərdi təqaüdçüsüdür (2005).

Vasif Hacağa oğlu Babayev 1965-ci ildə Azərbaycan Dövlət İncəsənət İnstitutunu bitirib. 1964-cü ildən Azərbaycan Dövlət Televiziya və Radio verilişləri komitəsində əvvəlcə rejissor köməkçisi, rejissor assistenti, rejissor, 1969-cu ildən isə televiziyanın baş rejissoru olub. 1991-ci ildə Azərbaycan Dövlət Teleradio verilişləri komitəsinin bədii rəhbəri vəzifəsinə təyin edilib. 1994-1996-cı illərdə "MİR" dövlətlərarası Teleradio şirkətinin direktoru, 1996-1999-cu illərdə "SARA" müstəqil Teleradio şirkətinin icraçı direktoru, 2001-2006-cı illərdə Moskvada Rusiyanın "İNTER-AZ" müstəqil Teleradio şirkətinin vitse-prezidenti işləyib.

Vasif Babayev müxtəlif janrlarda yüzlərlə veriliş və proqramlar hazırlayıb. O, 1969-1987-ci illərdə onlarla geniş formatlı "Yeni il - Mavi İşıq" televiziya proqramları və bayram verilişlərinin quruluşçu rejissoru olub.

Vasif Babayev jurnalist Nadejda İsmayılova ilə birlikdə 1988-ci ilin əvvəllərində kino-televiziya tarixində ilk dəfə olaraq Sovet Azərbaycanı dövründə KQB-nin arxivində araşdırmalar apararaq "Mikayıl Müşfiq", "Abbaz Mirzə Şərifzadə", "Ülvi Rəcəb", "Ruhulla Axundov", "Hüseyn Rəhmanov", "Salman Mümtaz" kimi "siyasi məhbuslar"ın şəxsi işləri əsasında bir sıra silsilə verilişlər hazırlayıb. 

Vasif babayev 40-a yaxın sənədli filmin müəllifi və rejissorudur. Həmin filmlərdən "Sahil bağı", "Odlar torpağı", "Qızıl güllər diyarı", "Sovet Azərbaycanı", "Azərbaycan artistlərinin konserti", "Yaddaşdan xatirələr (Sovet ölkəsinin uşaqları)", "Azərbaycan təranələri", "Ənənələrə sadiq", "Bakı-Tümen", "Onuncu beşillik, birinci il", "Onuncu beşillik, ikinci il", "Onuncu beşillik, üçüncü il", "Şəki", "Azərbaycan geniş addımlayır", "Onuncu beşillik, dördüncü il", "Xuraman", "Sovet Azərbaycanı, yeni nailiyyətlərə", "Meksika görüşləri", "Onuncu beşillik, beşinci il", "Onbirinci beşillik, birinci il", "Partiyanın canlı sözü", "Sovet Azərbaycanı, yeni uğurlara", "Onbirinci beşillik, ikinci il", "L.İ. Brejnev Bakıda", "Qızıl yamaclar", "Yaxşı yol, Azərbaycan", "Onbirinci beşillik, üçüncü il", "İçərişəhərin əbədi nağılı", "Onbirinci beşillik, dördüncü il", "Həqiqətin anı", "Sovet Azərbaycanı, zaman və insanlar", "Nəbi Xəzri", "Sovet Azərbaycanı, Respublika haqqında monoloqlar", "Xahiş edirəm, hazırlıq haqqında məlumat verin", "Xuraman on il keçmiş", "Quşlar üçün tələ",. "Seçim", "Birlikdə" və "Ot kökü üstə bitər" filmlərinin adlarını çəkmək olar. 

Bu filmlərin bəziləri müxtəlif kinoforumlarda mükafatlara layiq görülüb. 1967-ci ildə Kiyevdə "Prometey-67" zona kinofestivalı, "Sahil bağı" filmi debüt üçün mükafat alıb.

1968-ci ildə Moskvada Birinci Ümumittifaq telefilmlər festivalı, "Sahil bağı" ən yaxşı filmlər sırasında yer tutub.

1968-ci ildə Tbilisidə "Prometey-68" zona kinofestivalı, "Qızıl güllər diyarı" film-reportaj kimi diploma layiq görülüb.

1977-ci ildə Leninqradda Ümumittifaq telefilmlər festivalı, "Sovet Azərbaycanı" sənədli filmi SSRİ Jurnalistlər İttifaqının Prizini alıb. 

1978-ci ildə Vladivostokda Ümumittifaq telefilmlər festivalı, "Şəki" filmi Naxodka şəhərinin Prizi ilə təltif edilib.

1979-cu ildə Bakıda Ümumittifaq telefilmlər festivalı, "Xuraman" sənədli filmi Azərbaycan kino tarixində ilk dəfə olaraq "Böyük mükafat (Qran-Pri)", "Azərbaycan iri addımlarla irəliləyir" filmi isə festivalda jürilərin xüsusi mükafatına layiq görülüb.

1985-ci ildə Kiyevdə Ümumittifaq telefilmlər festivalı, "Həqiqətin anı" sənədli filmi diplom alıb.

1978-ci ildə Vladivostokda, 1979-cu ildə Bakıda, 1981-ci ildə Yerevanda, 1983-cü ildə Alma-Atada, 1985-ci ildə Kiyevdə Vasif Babayev Ümumittifaq festivallarında jürinin üzvü olub.

1970-1982-cü illərdə Vasif Hacağa oğlu Babayev Heydər Əliyevin iştirakı ilə keçirilən, demək olar, bütün vacib dövlət və hökümət tədbirlərinin, televiziya verilişlərinin, translyasiyalarının və canlı yayımlanan proqramlarının aparıcı rejissoru olub.

1972-1987-ci illərdə V.Babayev R.Həsənoğlu ilə birlikdə iki ildən bir SSRI Mərkəzi televiziyasından İNTERVİDENİYE sistemi ilə Avropaya yayımlanan iki saatlıq Azərbaycan haqqında proqramlarının müəllifi və rejissoru olub. Həmin proqramlarda Heydər Əliyev iştirak edib. Vasif Babayev Heydər Əliyev haqqında  televiziya və kino salnaməsinin yaradıcılarından biridir.

Vasif Hacağa oğlu Babayev 1966-cı ildə həm də Leninqrad Televiziyası nəzdində Ali Televiziya rejissoru kurslarını bitirib. 1967-1986-cı n illərdə o, Bolqarıstan, Yuqoslaviya, Avstriya, Macarstan, Yunanstan, İran, Türkiyə, Malta, İspaniya, Fransa, İtaliya kimi xarici ölkələrdə çəkilişlər apararaq verilişlər və kinofilmlər yaradıb. Vasif müəllim 1967-ci ildə Azərbaycan SSR Ali Sovetinin Fəxri Fərmanı ilə təltif edilib. 1973-cü ildən Kinematoqrafçılar İttifaqı Konfederasiyasının üzvüdür. O, 1977-ci ildə Azərbaycan respublikasının "Əməkdar artisti", 1981 -ci ildə "SSRİ Televiziya və Radio əlaçısı", 1989-cu ildə Azərbaycanın "Xalq artisti" fəxri adlarına layiq görülən ilk Azərbaycan televiziya rejissorudur. 

Vasif müəllim 1995-ci ildə "MİR" Dövlətlərarası teleradio şirkəti Azərbaycan nümayəndəliyinin direktoru işləyərkən, nümayəndəlik beynəlxalq "Humay" mükafatı alıb. 1999-cu ildə "Akademik Yusif Məmmədəliyev" medalı ilə təltif edilib. 2000-ci ildən Peşəkar Azərbaycan kinerejissorları gildiyasının üzvüdür.

Vasif Babayev televiziya və kino ilə bağlı yazıları ilə kütləvi informasiya vasitələrində dəfələrlə çıxışlar edib. O, böyük alim, təşkilatçı kosmik uçuşlar üzrə Dövlət Komissiyasının sədri general-leytenant Kərim Kərimov haqqında maraqlı film çəkib. Filmin müəllifi və rejissoru Vasif müəllim Kərim Kərimovla görüşlərini həyatının ən unudulmaz günləri kimi qəzet səhifələrində xatırlayır. "Kosmik miqyaslı zəkaya malik şəxsiyyət" - "Azərbaycan ordusu qəzeti" (30.12.2007), "Космическую эру открыл Королёв, но руководил всеми работами Керим Керимов" - "ЭХО" qəzeti (19.01.2008), 1990-cı il məlum yanvar hadisələrinə biganə qalmayan Vasif Babayev başına gələnləri və gördüklərini yaxşı xatırlayır. "Həyatımın ən ağır anlarını yaşadım" - "Azərbaycan" qəzeti (19.01.2005), "Азербайджанская трагедия" - Зеркало" qəziti (19.01.2008), "Qanlı yanvarı xatırlayarkən..." - "Azərbaycan ordusu" qəzeti (19.01.2008), "20 yanvar qürur tariximiz" - "525-ci qəzet" (19.01.2008). 

Vasif Babayev görkəmli televiziyonçu Elşad Quliyev haqqında öz fikirlərini də bölüşüb. "Televiziyanın xaç atası - Elşad Quliyev gözlərini yumdu" - "Şərq qəzeti" (28.05.08), "Эльшад Kулиев - телеэпоха" - "Зеркало" qəzeti (05.07.08). 

Vasif Babayev televiziya haqqında öz fikirlərini dəfələrlə kütləvi mətbuatda da dərc etdirib. "ЧТО, КТО, когда" - "Молодеж Азербайджана" (29.09.1987), "Bir günün xatirəsi" - "Ədəbiyyat və İncəsənət" qəzeti (26.08.1988), "Mənim siyasətim həftə proqramıdır" - "Azərbaycan" qəzeti (06.05.1993), "MİR bizi dünyaya tanıdır" - "Səhər" qəzeti (21.05.1994), "Mən televiziyanı özümdə tapdım" - "Panorama" qəzeti (22.06.1999), "Əsəbi adamın etirafı" - "Azadlıq" qəzeti (11.04.2000), "Vaxt gələcək televiziyanın girəcəyində mənim və qardaşım Arifin abidəsini qoyacaqlar" - "Məqam" qəzeti (08.09.1999), "Gün keçdi" - "Yeni Müsavat" qəzeti (19.09.1999), "Doqquz filmdən biri "Seçim" - "Xalq" qəzeti (27.08.2000), "Özəl telekanalda televiziya sənətkarlığı çox aşağı səviyyədədir" - "525-ci qəzet" (10.05.2001), "Özəl televiziyaların səviyyəsi aşağıdır" - "Etimad" qəzeti (13.12.2002), "Васифу Бабаеву присвоено звание академика" - "Азербайджанская диаспора" (04.2004), "Yerlimiz akademik adına layiq görüldü" - "Ədalət" qəzeti (17.06.2004), "Аккорды большого пути" - Баку г. (11.05.2006), "Əsgər deyiləm ki" - "Gün qəzeti (16.09.06), Васиф Бабаев: "Сильные режиссеры не берутся за сериалы" - "Эхо" qəzeti (20.12.2006), "Kişinin düşməni olar" - "Ədalət" qəzeti (05.06.2007), "Kinomuzda inkişaf var" - "Kaspi" qəzeti (03.08.2007), "İstedadlı televiziya rejissoru" - "Azərbaycan" qəzeti (19.09.2007), "Elə ssenarilər var ki, onları çəkəcək rejissorları mən hələ görmürəm" - "Xəzər" qəzeti (17.05.2008), "Efırə çiy verilişlər çıxır" - "Həftə içi" qəzeti (06.11.2007), "Televiziya sirli-sehrli bir dünyadır" - "Paritet" qəzeti (08.09.2009).

Vasif Babayevin hazırladığı verilişlər və proqramlar:

"Hər çinardan bir yarpaq", "Görüşlər, xatirələri" silsilə - AzTv.

"Arzular" musiqi poçtu, "Şənbədən Şənbəyə" silsilə - AzTv.

"Mahnı şəhəri gəzir", "Dostluq" konsert studiyası" silsilə - AzTv.

"Nəğməli bağ", "Asiman" silsilə - AzTv.

"Yaradıcılıq portretləri", "Ədəbi Üfuqlər" silsilə - Aztv.

"17-ci mərtəbə", "Şans bazarı" silsilə - Sara Tv.

"Korifeylər", "Arzular, Təbriklər" silsilə - Sara Tv.

"Axşam görüşləri", "Gecə kanalı" silsilə - İnterAz Moskva.

"Şurum Burum", "Rezonans" silsilə - Sara Tv, İnterAz Moskva.

"24 saat", "HƏFTƏ" silsilə - AzTv.

"Dalğa" silsilə - AzTv, "Yeddi gün" silsilə - AzTv, Sara Tv

"Kontakt", "Dedim-Dedi" silsilə - Sara Tv

"Sara-xəbər" silsilə - Sara Tv, "İnter-Diaspora" silsilə - İnterAz. Moskva

Vasif Babayevin filmləri:

Azərbaycan iri addımlarla addımlayır (film, 1979)

Bakı beş dəniz limanıdır (film, 1967)

Əgər bir yerdəyiksə (film, 1975)

Həqiqətin anı (film, 1984)

Xuraman (film, 1978)

İçəri şəhər-əbədi nağıl (film, 1984)

Kərim Kərimov (film, 1988)

Qızılı yamaclar (film, 1982)

Nəbi Xəzri (film, 1987)

Odlar torpağı (film, 1967)

Sahil bağı (film, 1967)

Sovet Azərbaycanı (film, 1972)

Sovet Azərbaycanı (film, 1977)

Şəki (film, 1977)

Zirvə Buludu (1968)

---

Vasif Hacağa oğlu Babayev görkəmli televiziya və kino rejissoru Arif Babayevin kiçik qardaşlarından biridir. O, həm də mənim sevimli, etibarlı, vətənpərvər dostlarımdan biridir. Vasif müəllimi bugünədək hər il doğum günü münasibətilə təbrik etməyimdən qürur duyuram. İndi isə Babayevi Azərbaycan dövlət radiosunun 100, dövlət televiziyasının 70 illik yubileyi qarşısında səmimi qəlbdən təbrik edirəm. Ona ailəsilə birlikdə can sağlığı, uzun ömür və firavan günlər arzulayıram. 

❤ © Adil İrşadoğlu Cavanşir (Əliyev).

Veteran televiziya və qəzet jurnalisti,

Azərbaycan Jurnalistlər Birliyinin üzvü (1980),

1-ci Qarabağ Müharibəsinin iştirakçısı-Qazi (1988-1996).

Yazımı yenidən işlədim: 14.09.2026. / 12-00.

Paylaşdım: 03.11.2026. / 13-05.